Esti llibru ye la tercer entrega d’un trabayu en marcha, el cuadernu o dietariu d’un cineasta, Ramón Lluís Bande, que va apurriendo nél les sos llectures, reflexones y porgüeyos de cada día, que casi siempre tienen que ver cola última película que ta rodando o cola próxima que ta armando. Nes esmoliciones y nes propuestes de Bande nun ye posible dixebrar lo ético de lo estético; tampoco nesti casu, onde l’usu d’una distanciadora tercera persona axuda a quita-y tou engolamientu al discursu, que paez enfotáu n’afondar en suelu firme pa llantar les pilastres de la so obra cinematográfica sobre idees y presupuestos sólidos. La memoria ye’l material del que tán fechos los suaños d’esti autor, que nun persigue la oxetividá sinón el compromisu, y que quier más plantegar entrugues que buscar certeces o fabricar respuestes: «La memoria ye un ríu. Tolo que saquemos d’él van ser namás fragmentos d’una corriente infinita». |